Шинэ эрин үе – Их Багш Беинса Дуно (Петер Дынов) (цагаан хоолтон)-гийн айлдвар, нэвтрүүлгийн 2-ын 2-р хэсгийг

Роберт Пауэллийн танилцуулсан “Петер Деуновын (Беинса Дуно) зөгнөл” дэх “Шинэ эрин үе” (1944) хэмээх гүн утгат лекцийг үргэлжлүүлэн сонсоцгооё.

Шинэ Эрин үе (1944)

“Шинэ эрин бүр шинэ хэмнэлээр эхэлдэг. Өнөөдөр Амьдралд шинэ хэмнэл ирж байна. Тэнгэрлэг хүч хаа сайгүй замаа нээж байна. Одоо ирж буй Давлагаа зөвхөн биднийг төдийгүй бүх эрдэс, ургамал, амьтныг ч мөн дээш өргөнө. Энэ Давлагаагаар дээшилж чадахгүй хүмүүс ирээдүйд үлдэнэ. Санаж яв: Байгальд үзэгдэл давтагддаггүй тул үүнтэй адил өөр Давлагаа дахин ирэхгүй. Хэрэв ирээдүйг хүлээвэл тэр цагийн нөхцөл илүү хүнд байна. Шинэ Мэдлэг, Шинэ Соёл дэлхийд ирж байна. Би үүнийг Тэнгэрлэг Хайр, Мэргэн Ухаан, Үнэний Соёл гэж нэрлэдэг. Энэ нь хүмүүст хэрхэн амьдрахыг заана. Хуучин амьдрал бол зовлон, харин шинэ амьдрал бол баяр баясал. Үндэс нь хуучин амьдрал, мөчир нь шинэ амьдрал юм. Өнөөдөр бид хайрын гачигдлын төгсгөлд, Тэнгэрлэг, болзолгүй Хайрын эхэнд байна. Хүнийг хэн сэрээдэг вэ? Түүнийг халамжилдаг нэгэн. Эх хүн хүүхдээ сэрээдэг. Энэ нь эх хүн үрээ халамжилж байгааг харуулна. БУРХАН бол хүмүүсийг Сэрэмжлэн Харагч бөгөөд энэ нь ТЭР тэднийг халамжилдгийг харуулдаг. Өнөөгийн эрин үед сэрээгүй хүмүүс өөр цаг үед үлдэнэ. Тэнгэрлэг зүйлийг хүлээн авч чадахгүй хүмүүст юу тохиолдох бол гэж бид гайхдаг. Хариулт нь тодорхой. Би жимсний модонд очоод боловсорсныг нь хурааж, бусдыг нь хүлээнэ. Тэднийг боловсроход мөн түүж, муудсан жимсийг бордоо болгоно. Дараа нь тэд ч бас сайхан жимс болно. Та нар: ‘Яагаад ийм байдаг юм бэ?’ гэж асууна. Учир нь үүнээс өөрөөр байх боломжгүй.

Сударт: ‘Намайг ойрхон байгаа дээр эрэгтүн’ гэжээ. Энэ нь: Намайг та нарт ойрхон байгаа дээр таатай нөхцөлийг ашигла гэсэн үг. Хэрэв хүмүүс ирээдүйд тэдэнд юу ирэхийг мэдээд гайхширвал тэр гайхширал нь айсуй Сайн сайхныг ашиглах боломжийг нь үгүй хийнэ. Тиймээс Амьдралын нөхцөлийг ашиглахын тулд сүнсэнд амар амгалан авчрах мэдлэгтэй байх хэрэгтэй. Мэдлэггүй байдал хүмүүсийг түгшүүрээр дүүргэдэг. Өнөөдөр Шинэ зүйл дэлхий даяар ирж байна. Шинэ зүйл гэж юу вэ? Энэ нь ямар хэлбэрээр илрэхийг цөөн хүн л ойлгож чадна. Шинэ мөчлөг бүрэлдэж байна. Түүнд орж чадах хүмүүсийн өмнө асар их боломж нээгдэнэ. Хэрэв та бэлэн биш бол таатай нөхцөлийг алдана. Тэнгэрлэг хүч дэлхийд ирж байна. Өнөө цаг туйлын аюултай үе юм. Та унтаж хоцроод гадна нь үлдэж мэднэ. Тэнгэрлэг Галт тэрэг яг цагтаа ирдэг! Та ердөө ганц секундээр хоцорч мэднэ. Тиймээс ухамсар, зүрх сэтгэл, оюун ухаан тань сэрэмжтэй байх ёстой. Дэлхий дээр мянга мянга, сая сая жил амьдарч, өчнөөн зовлон туулсан хүн энэ мөчийг алдаж, Галт тэрэгнээс хоцрон, Тэнгэрлэгийг хүлээн авахгүй үлдэхийг хүснэ гэж үү? БУРХАН тан дээр ирэхдээ сэрэмжтэй байгааг тань олж харвал та үр адил ургана, өсөж хөгжөөд үр жимсээ өгнө. Өдөр хоёр хагастай. Нэг нь Нар мандах үе, нөгөө нь Нар жаргах үе. Үд хүртэл өгсөлт явагдана, үдээс хойш уруудалт эхэлнэ. Энэ хууль уг эрин үед ч мөн адил үйлчилнэ. Одоогийн эрин уруудаж буй бөгөөд үүнийг зогсоох боломжгүй. Харанхуйн хүчнүүд явж байна. Хавар яг цагтаа ирдэгтэй адил Сайн сайхан ч товлосон цагтаа яг ирнэ. Хавар ирэхэд бүх зүйл цэцэглэдэг. Тэнгэрлэг хүч ирэхэд ч мөн адил зүйл тохионо.

Гэрэлт эрин ирж байна. Ахан дүүгийн ёсны үзэл санаа бодит биеллээ олно. Энэ Тэнгэрлэг Хавар гэнэт бус, аажмаар ирнэ. Хүмүүс өөрсдөө ч анзааралгүй өөрчлөгдөнө. Тэд хэрхэн өөрчлөгдөж байгаагаа огт анзаарахгүй. Нэг л өдөр тэд сэрээд, хүр хорхой бүрхүүлдээ орж, дотроо навч идэхээ больсон эрвээхэй болон хувирдагтай адил шинэ шатанд хүрснээ мэднэ. Одоо ирж буй зүйлийг ‘Хүн төрөлтний дотоод дахь Тэнгэрлэг Эх Үүслийн илрэл’ гэж нэрлэж болно. Ирж буй шинэ үеийнхэн дэлхий ертөнцийг шинэчилнэ. Энэ нь бид хүр хорхойнууд эрвээхэй болон хувирах эрин үед байна гэсэн үг. Эрвээхэй болж амжаагүй хүр хорхойнууд агаарт хэрхэн амьдарч болохыг асууна. Эрвээхэй болсон хойноо тэд сурна. Хүр хорхой хэвээр байхдаа тэд үүнийг сурч чадахгүй. Өнөөдөр амьдрал илүү идэвхтэй болжээ. Олон жилийн өмнө нярай хүүхдүүд төрснөөсөө хойш гурван долоо хоногийн дараа л нүдээ нээдэг байв. Харин өнөөдөр тэд төрсөн даруйдаа нүдээ нээдэг. Энэ үзэгдэл хаа сайгүй, бүх үндэстэнд бий. Даруу хүмүүс дэлхий ертөнцийг эмхэлнэ. Даруу хүмүүс гэж хэн бэ? Нэгэн удаа хоёр хүн шүүхэд заргалджээ. Тэдний нэгнийх нь хүү ирээд эцэгтээ: ‘Аав аа, таны шүүхээр заргалдаж буй тэр зүйл бидэнд хэрэггүй. Үүнийг мартаж, уучилцгаая.’ гэжээ. Тэр хүүг шийдэмгий бус гэж үзсэн ч шүүх маргааныг зогсоож чадсан юм.”