Дэлгэрэнгүй
Татаж авах Docx
Дэлгэрэнгүй уншаарай
Бүгдээрээ Упасака Лу Куань Юйн орчуулсан Баатраа явагч Их хөлгөн судрын “Үл гэгээрснээс үүдэх оршихуйн зургаан төрөл” хэмээх 7-р бүлгийн түүврээр үргэлжлүүлцгээе. Үл гэгээрснээс үүдэх оршихуйн зургаан түвшин: Сансарын хүрдэн дэх амьд төрөлтнүүдийн зургаан төрөл Тамын орон “Хэрэв түүний хүсэл тэмүүлэл ба бодлын харьцаа ес нэг бол тэрээр галын хүрдэнд живж, салхи гал хоёр нийлэх газарт дахин төрөх болно. Хүсэл тэмүүлэл нь их бол, завсрын тамд, хэрэв хүсэл тэмүүлэл нь нэн их хүчтэй бол, тасралтгүй үргэлжлэх тамд, харин туйлын догшин хүсэл тэмүүлэлтэй бол, авичи тамд орших болно. Хэрвээ, үүнээс гадна тэр Их хөлгөнийг гүтгэж, Бурхан Багшийн сахилыг зөрчин, хувийн ашиг хонжоо эсвэл алдар нэрийн төлөө өглөгийн эздээ хуурахаар Үнэн Номыг гуйвуулан айлдаж, 5 тэрс үйл, 10 хүнд нүгэл үйлдвэл авичи там бүрд (ээлж дараалан) дахин төрнө. Хэдийгээр дээр дурдсан зүйлс нь хувь хүний үйлдсэн муу үйлийн үр дүнд өөрт нь ногдож буй шийтгэлүүд боловч, нүгэлтнүүд бүгд (ижил) давхацсан шалтгаанаас үүдэх адил төрлийн зовлонг эдэлдэг”. Тамын орны арван шалтгаан ба зургаан үр: Тамын орны хүргэх үйлийн үрийн арван шалтгаан “Ананда аа, эдгээр (шийтгэл) нь муу дадлаараа үйлийн үрийн 10 шалтгаан үүсгэж, улмаар зургаан төрлийн шийтгэл эдэлдэг амьд оршнолуудын үйлийн үрээс үүддэг. Бэлгийн хүслийн дадал Ананда аа, эдгээр арван шалтгаан юу вэ? Бэлгийн харьцааны үеэр 2 хүн бие биеэ энхрийлснээр халуун үүсэж, тэр нь хүслийг дахин өдөөдөг учраас хүсэл тачаал дадал болдог. Энэ нь алгаа хооронд нь үрэхэд халуун үүсдэгтэй адил. Үйлийн үр ба тачаалаас үүдсэн хоёр дадал бие биеэ өдөөж, халуун зэс тулгуур дээрх халуун төмөр орны үзэгдлийг бий болгодог. Тиймээс бүх Бурхан бэлгийн харьцааг хүслийн дүрэлзсэн гал хэмээн үзэж, бүх Бодисадва махан биеийн таашаалыг галт нүх мэт үзэж зайлсхийдэг. Хүсэл шуналын дадал Хүсэл шунал нь зууралдан барих сэтгэлээс үүдэн дадал зуршил болон өсөж хөгждөг. Зууралдан барих гэдэг нь нэгэн төрлийн сорох хүч мэт бөгөөд цаг хугацаа өнгөрөхийн хэрээр хүйтэн, хяруу, жихүүдэс болон дагжин чичрэх мэдрэмжийн хуурмаг төсөөллийг бий болгодог. Энэ нь уруулаа жимийж амьсгаа авахад хүйтэн мэдрэгддэгтэй адил. Үйлийн үр ба шунан хүсэхүйн нийлбэрээс үүдэх шийтгэл нь тэсгим хүйтэнд хашхирч, (арьс нь) хөхөрч, улайж эсвэл цайх зовлонгоор илэрдэг. Тиймээс бүх Бурхан шунан хүсэхүйг шуналын ус хэмээн үзэж, бүх Бодисадва түүнийг халдвар тээгч уур манант далай хэмээн зайлсхийдэг. Бардамнах дадал (Бусдыг) дарлах байдлаар илэрдэг зүй бус харьцаанаас үүдэн бардамнал дадал болж, улмаар хуралдан их ус болох тогтворгүй давлагааны (хий үзэгдлийг) бий болгодог. Энэ нь амаа долоож шүлсээ ялгаруулахтай адил. Үйлийн үр ба бардамналаас үүдсэн хоёр дадал бие биеэ өдөөж, цусан гол, (халуун) үнс, шатаж буй элс, хорт далай, нүгэлтний хэлэн дээр цутгах хайлсан зэсийн (үзэгдлийг) бий болгодог. Иймээс бүх Бурхан өөрийгөө дөвийлгөхийг мунхгийн ус хэмээн үзэж, бүх Бодисадва түүнээс живэх аюул мэт зайлсхийдэг. Уур хилэнгийн дадал Уур хилэн нь аливаад амархан бухимдах байдлаар аажмаар дадал зуршил болж, тэр нь зөрүүд зангаар илэрдэг бөгөөд цаг хугацаа өнгөрөхийн хэрээр зүрхийг халааж, тэрхүү халуун нь амин амьсгалыг төмөрлөг чанартай болгон хувиргадаг; Ингэснээр хутган уул, төмөр багана, илдэн мод болон илдэн хүрд, сүх, жадат сүх, жад, хөрөөний хий үзэгдэл бий болдог. Энэ нь зөрүүд зандаа хөтлөгдөн буруугийн өшөөг авах хүнтэй адил. Үйлийн үр ба уураас үүдсэн хоёр дадал бие биеэ өдөөж, хөнгөлөх, цавчих, толгой таслах, хэсэглэх, шархдуулах, мөчлөх, мунадах, цохих үзэгдлийг бий болгодог. Энэ нь хилэгнэн уурлаж, бурууг засахын тулд хүн алахад ч бэлэн болсон хүнтэй адил. Тиймээс бүх Бурхан үзэн ядалтыг хурц илд хэмээн үзэж, бүх Бодисадва түүнээс өөрийг нь цаазлах аюул мэт зугтдаг. Мэхлэх дадал Хуурч мэхлэх байдлаар илэрдэг урхидалтаас үүдэн мэхлэх нь дадал болж, улмаар нүгэлтнийг хүлэх оосор, саваа, олс, хөдөлгөөнийг нь хязгаарлах дөнгийн (хий үзэгдлийг) бий болгодог. Энэ нь өвс ургамал ургуулахын тулд талбайг усаар дүүргэхтэй адил. Үйлийн үр ба мэхлэлээс үүдсэн хоёр дадал бие биеэ тэтгэж, ингэснээр дөнгөнд хүлэх, цоожоор түгжих, ташуурдах, саваагаар ороолгох, хус модон саваагаар жанчих, бороохойгоор нүдэх зэрэг шийтгэл хүртэх ёстой муу үйлийг улам олноор төрүүлдэг. Иймээс бүх Бурхан мэхлэхийг гүтгэлэгтэй адил хортой хэмээн үзэж, бүх Бодьсадва түүнээс чоно мэт зайлсхийдэг. Худал хэлэх дадал Залилах хэлбэрээр илэрдэг мэхлэлтээс үүдэн худал хэлэх нь дадал болж, эцэстээ урвалтад хүргэдэг. Энэ нь тоос, баас, шээс зэрэг бохирын (хий үзэгдлийг) бий болгодог. Энэ нь салхинд хийсэж, бүхнийг халхлах тоостой адил. Үйлийн үр ба худал үгнээс үүдсэн хоёр дадал бие биеэ эрчимжүүлж, эцэстээ живэх, шидэгдэх, хийсэх, доош унах, урсах, живэх зовлонд хүргэдэг. Тиймээс бүх Бурхан худал хэлэхийг дээрэм, аллагатай адил хортой хэмээн үзэж, бүх Бодисадва түүнээс хорт могой гишгэхээс зайлсхийх адил зайлсхийдэг. Гомдох, хорсох дадал Хорлох санаархал болон илэрдэг зэвүүцэл, дургүйцлээс үүдэн хорсол нь дадал болдог. Энэ нь чулуугаар шидүүлэх, харвуулах, хоригдол тээвэрлэх тэргэнд түгжигдэх, урхинд орох, шуудайд хийгдэх, цохиулах (хий үзэгдлийг) бий болгодог. Энэ нь үргэлж муу санаа агуулж явдаг үймээн дэгдээгчтэй адил. Үйлийн үр ба өс хонзонгоос үүдсэн хоёр дадал нийлж шидүүлэх, ийш тийш хүчтэй чулуудуулах, баригдах, хоригдох, цохиулах, буудуулах шийтгэлд хүргэдэг. Иймээс бүх Бурхан хорсол, гомдлыг муу сүнс хэмээн үзэж, бүх Бодисадва түүнээс хор хийсэн дарс мэт зайлсхийдэг. Буруу үзлийн дадал Аливааг буруу ойлгож, ташаа тайлбарласнаас буруу үзэл бодол хэвшил болон тогтдог. Үүнд ‘Би’ хэмээх эго болон эд юмсын жинхэнэ мөн чанарыг танин мэдэхтэй холбоотой (таван ташаа) ойлголтоос эхлээд, даяанчлалын хатуу чанд хориг цээр хүртэл багтана. Энэ нь бодит үнэнээс татгалзан, бодит бусадтай зууралдсанаас үүсэлтэй үйлийн үрийн нөлөөг буруу ойлгоход хүргэдэг. Ингэснээр эсрэг зүгээс ирсэн хоёр хүн нэг зам дээр уулзахаас зайлсхийж чадахгүйтэй адил, (үгүйсгэх аргагүй) нотлох баримтад тулгуурлан шүүгдэх (хий үзэгдэл) бий болдог. Үйлийн үр ба буруу үзлээс үүдсэн хоёр дадал нийлж, асуулт тавих, хөндлөнгийн байцаалт явуулах, шүүхийн мөрдөн шалгалт хийх, лавлан шалгах, байцаалтад орох, шүүх дээр зөв буруугаа илчлүүлэх (үзэгдлийг) үүсгэх бөгөөд сайн, муу өмгөөлөгчид баримт бичиг гарган, тэдгээрийн талаар маргалддаг. Тиймээс бүх Бурхан буруу үзлийг гажуудлын ёроолгүй ангал хэмээн үзэж, бүх Бодисадва түүнээс хороор дүүрсэн хавцал мэт зайлсхийдэг. Шударга бус хандах дадал Гүтгэлгээр илэрдэг хилс буруутгалаас үүдэн шударга бус хандах нь дадал болдог. Энэ нь тал талаас нь хавчин шахаж нүгэлтнийг няцалж, хугалж, зүсэж, няцлах уул, хадны (хий үзэгдлийг) бий болгодог. Энэ нь гэмгүй хүнийг зүй бусаар хохироохтой адил. Үйлийн үр ба шударга бус явдлаас үүдсэн хоёр дадал нийлж, нүгэлтнийг хуулиар баривчлах, дарамтлах, зодох, нухчин дарах, албадах, хязгаарлан хорих, барих (хий үзэгдлийг) бий болгодог. Тиймээс бүх Бурхан гүтгэлгийг бартай адил хортой хэмээн үзэж, бүх Бодисадва түүнээс аянгын нүргээн мэт зугтдаг. Маргалдах дадал (Өөрийн дутагдлыг) нуух байдлаар илэрдэг олон үгнээс үүдэн маргалдах нь дадал болдог. Энэ нь гэгээн цагаан өдөр юмсыг нуух аргагүйтэй адил, толинд тусах эсвэл дэнлүү асаахад нууц ил болдог шиг (хий үзэгдлийг) бий болгодог. Үйлийн үр ба маргаанаас үүдсэн хоёр дадал эцэстээ (нүглийг) илчилдэг; Учир нь толь, дэнлүү нь урьдын үйлийн үрийг (эцсийн) шүүлтэд зориулан ил гаргадаг. Тиймээс бүх Бурхан нуун далдлахыг нууц дайсан хэмээн үзэж, бүх Бодисадва үүнийг толгой дээрээ уул үүрэх эсвэл далай руу алхахтай адил аюултайд тооцдог.”
